Boltinn: Vika 3 og 4

Það gleymdist víst að setja inn færslu eftir síðasta bolta, enda var ég í sárum. Sárt tap þá vikuna, sem reyndar er algerlega gleymt í kjölfar hins góða sigurs sem mitt lið landaði í gær.

Það skyggði þó talsvert á gleði undirritaðs í gærkvöldi þegar ég sleit lærið/nárann á mér í tvennt undir lok tímans. Hvort um er að ræða lærið eða nárann kemur betur í ljós í kjölfar læknisskoðunar í dag. Tel samt harla ólíklegt að ég verði leikfær í næsta tíma eða jafnvel næstu tímum. Súrt.

Hvað stöðuna varðar þá er sérstaklega gaman að sjá hversu stífar æfingar Svans í sumar hafa skilað sér. Einnig er það góð staðfesting á háum gæðum boltans að sjá nafn Hálfdáns í neðsta sæti, en hann er að mæta í boltann í fyrsta sinn í ár. Eðlilega tekur tíma að komast í takt við aðra spilara, enda er þetta háa tempó og þessi miklu gæði ekki eitthvað sem menn finna í Cheerios pakkanum á morgnana. Þetta snýst um æfingar.

Staðan e. viku 4
1.-5. Doddi - 7 stig
1.-5. Jón Ingi - 7 stig
1.-5. Markús - 7 stig
1.-5. Siggi - 7 stig
1.-5. Svanur - 7 stig
6.-7. Jón Eggert - 4 stig
6.-7. Stebbi - 4 stig
8.     Hálfdán - 1 stig

Að lokum verður maður "boltans" valinn í þetta skipti en þar kemur einungis einn til greina. Stefán Helgi Jónsson lagði það á sig í gær að hringja í hvern einasta mann og minna á tímanlega mætingu. Skilaði þetta sér í því að allir leikmenn, að Stefáni sjálfum undanskildum, voru klárir 10 mínútum fyrir byrjun tímans, sem er vel. Stefán hins vegar mætti sveittur 10 mínútum of seinn með kvittun frá Hreyfli í rassvasanum. Kallinn hafði ekki fundið lyklana að bílnum og þegar hann sá í hvað stefndi var splæst í einkabílstjóra og brunað á staðinn. Held að klapp á bakið dugi ekki til að verðlauna menn sem leggja sig svona fram fyrir málstaðinn... Útnefningin á manni boltans er sárabót.